香港新浪網 MySinaBlog
« 上一篇 | 下一篇 »
| 4th Oct 2011, 20:33 | 肺話多講 | (18 Reads)

百忙之中偶然在面書留了點腳印,順便引用過來與各位親愛網友分享一下。內容寫得倉卒,用字口語未免粗疏,勿見笑。



關於投資, 大部份人響概念上都有以下幾個錯誤:

1. 市場波動帶黎風險 - 事實上, 大部份時間風險都係黎自投資者自己. 股票市場只係一個媒介, 點樣從中獲利100個人可以有100種唔同既方法. 每人對市場既敏感性, 掌握力都唔同, 挑選自己了解並可以掌握既理論, 揀選合適, 有能力操控既工具, 訂下可行, 有退路既目標, 就係贏錢之道. 巴菲特係股神唔係因為價值投資, 而係因為佢本身具備成為股神既條件: 響適當既時候, 做適合自己既決定.

2. 長渣穩賺, 有能力守唔駛驚跌 - 公司雖然係死, 但公司掌駝人係生, 牽涉到人既野就有可能出錯, 歷史上因為做錯一兩個商業決定而玩完既超巨企多如恆河沙數, 就算創香港半世紀傳奇既5仔都要基乎死於美國房貸風暴, 如果咁樣你都仲繼續做長渣信徒, 就真係很傻很天真.

3. 淡友靠人PK發達, 賺左都背隻骨落 - 人有生老病死, 月有陰晴圓缺, 股市同樣有升必有跌, 此乃大自然既規律, 宇內不變既法則, 問題只係你有冇能力有冇觸覺有冇膽量去捕捉. 香港股市成型至今都幾十年, 起起落落凡幾. 無人做淡, 係咪指數就唔會跌? 如果今時今日你都仲認為仆倒入去買上先係賺錢真理, 大眾GOGOGO先係皆大歡喜, 唔好意思, 心智未成熟既人真係唔太適合玩股票.

4. 股價已經遠低於合理值, 再跌空間有限 - 先唔好理股票價格係咪真係有所謂可以計算出黎既合理值, 就算有, 問題係呢個合理值意義何在? 你望一望周圍, 全世界政府透支未來十年黎救幾間人渣銀行, 合唔合理? 投資銀行同時設計賭具, 賭例, 又參與賭局, 合唔合理? 唔好講咁遠, 股票呢樣野本來係要黎俾你參與投資企業分享利潤既媒界, 你地當左係搵快錢工具, 連間公司做乜都未必知就淨係在意股價GOGOGO, 只求低渣高沽食盡全個升浪, 咁又好合理咩? 唔該醒一醒, DAY 1你已經唔係玩緊一個講合唔合理既遊戲, 如果佢狂升既時候你唔會理佢合唔合理, 咁狂瀉既時候就唔好問人合唔合理.

有機會再續。 

留言(0) | 引用(0) | 話題(股市)