香港新浪網 MySinaBlog
« 上一篇 | 下一篇 »
| 1st Nov 2011, 09:38 | 肺話多講 | (14 Reads)

唐唐問小學入U率 「雙英」唔熟書

 明報 – 2011年10月31日星期一上午5:14

 

【明報專訊】每逢周日都係「雙英」嘅show time,至今仲未肯表態參選特首嘅唐英年(唐唐)同梁振英(CY),噚日又前後腳喺油塘嘅基法小學同業界大談教育政策。政壇上有「政界黎明(金句王)」之稱嘅唐唐噚日又有力作,當佢到場後就問基法小學校長梁淑儀﹕「你哋呢間學校入大學嘅比率有幾高?」梁校長即時話﹕「其實我哋呢間係小學嚟嘅。」雙方即時靜咗幾秒。

在場有老師及同學都批評,現時嘅校本評核(SBA),既嘥時間又麻煩,希望政府早日檢討。唐唐話明白SBA令學校面對好大壓力,仲特別提到小學面臨好多考試,未來要聽取學生同學校嘅意見再檢討SBA。之但係,Emily知道SBA係中學先有嘅,同小學無關。

CY明言唔知殺校線

至於CY同樣都係唔熟書,被台下追問多次有關幼兒教師薪級表,佢都冇正面回應。至於有記者問佢知唔知道殺校線(即中一收生人數下限)係咩,CY好直接咁話自己唔知道。

主辦單位教評會透露,原來「雙英」前後腳同梁營有關,話說教評會原本打算請唐梁二人同場,但梁營話CY當日唔喺香港。點知當唐唐應邀出席後,梁營又話CY可以出席,仲主動提議喺唐唐發言前兩個鐘到場。